خاطرتين

خاطرتين خطروا على دماغى فجأة فقلت أكتبهم فورا قبل ما يضيعوا فى الزحمة

ولنبدأ دون ابطاء

اوعى تاخد على قفاك

بعيدا عن دعوات المقاطعة ، كل ماأشوف حد ماسك بيبسى كانز اللى مرسوم عليها هيفاء وهبى وكارول سماحة

أحس ان الشخص ده أخد على قفاه ، وان المسئولين فى شركة بيبسى قاعدين يضحكوا على المغفلين دول اللى بيشتروا العلب دى

ليه أنا باحس بكدة

طبعا شركة كبيرة زى بيبسى بتبحث عن زيادة مبيعاتها بأى شكل ، وبيعملوا دراسات مستمرة على الجمهور عشان يعرفوا كل حاجة عنه

اتجاهاته اهتماماته بيحب ايه بيكره ايه ..........الخ

طبعا معروف دلوقتى ان هيفاء وهبى بقت هى رمز المرحلة دلوقتى ، وان الشباب بيتهبل عليها وبقت هى معشوقة الشباب

ومن المعروف ان بيبسى بتستعين بمطربين ومطربات للترويج لمنتجاتها ، فطبعا مالاقوش أحسن من هيفاء تعلن عن المشروب

لكن المرة دى الموضوع ماقتصرش على الاعلانات بس لكن دول كمان حطوا صورة هيفاء وهبى وكارول سماحة ومطربة تالتة مجهولة معرفش اسمها على علب الكانز

ليه عملوا كدة

فى تصورى حتى لو كان تصور كوميدى

المهم فى تصورى ان مسئولين الدعاية فى شركة بيبسى فكروا وعملوا دراسات على الجمهور

وتوصلوا الى نتيجة

أو هما شايفين كدة

شايفين أن جزء كبير من الشباب أهبل وعبيط وبريالة ، وأنه أول مايشوف صورة هيفاء على العبوة هيتهبل ويزبهل ويشتريها على طول

عشان كدة أنا شايف أن اللى يشترى بيبسى كانز يبقى أثبت انه زى ما شركة بيبسى فاكرة بالظبط ( أهبل وعبيط وبريالة)ا

و باحس انه أخد على قفاه وبيبسى أخدت فلوسه عن طريق هيفاء

عن نفسى مش باحب اخد على قفايا

ونصيحة ليك

اوعى تاخد على قفاك

تحيا مصر فى الديسكو

فى فيلم خليج نعمة جايبين أغنية (حلوة يا بلدى) اللى كانت بتغنيها داليدا

بس الفرق ان هما المرة دىبيغنوها بسم الله ماشاء الله فى الديسكو

أغنية عن مصر بتتغنى فى الديسكو ، والمخرج بيتفنن فى اظهار الرقص والأحضان والخمرة ،

لاء وكمان الأغنية مجرد وسيلة عشان البطل والبطلة يحبوا بعض ويتبادلوا النظرات السهتانة مع بعض

مش عارف ايه علاقة الرقص والديسكو والخمرة بأغنية عن الوطن

وايه لازمة انهم يغنوا الأغنية وسط الكلام ده كله ، هو الوطن بقى مرتبط بالرقص والخمرة ولا ايه

الظاهر أن الوطن اللى يقصدوه فى الأغنية هو وطن الأغنياء اللى فى الديسكو اللى مخليهم بانيين أسوار عالية حوالين فيلالهم عشان ماحدش من الرعاع يتطفل عليهو ويزعجهم عشان كدة مش شايفين مصر التانية

أو يمكن يقصدوا أى وطن تانى ماعدا مصر أو حتى البرازيل اللى جايبين واحد فى الأغنية ماسك علمها

وأعلام تانية كتير

يظهر عملوها أغنية لكل الأوطان (انتر ناشونال يعنى )ا

هو ده اللى بيخلى السياح يفتكروا ان مصر بلد الكباريهات وبييجوا يمارسوا أمراضهم وقرفهم فى مصر

وللأسف بيلاقوا الترحيب والضيافة والمساعدة كمان

الأغنية عن مصر تحولت لاعلان عن كباريه

هى دى الدعاية ولا بلاش