بتحصل فى أحسن العائلات

كل ماتحصل مصيبة فى البلد تلاقى الطبالين والزمارين يقولوا لك يا أخى هو ده بيحصل عندنا بس؛ ده بيحصل فى كل حتة وفى أحسن العائلات وماحش أحسن من حد

زى قانون الارهاب يقولوا (ماهى فرنسا عندها قانون ارهاب) طبعا قانون ارهابهم مش زى قانون ارهابنا خالص

ارهابهم فرنسى رقيق بسكوتة ياعينى عشان كدة تلاقى قانونهم رقيق

أما ارهابنا فقادم من بولاق وامبابة وشبرا عشان كدة لازم قانون ارهاب يديله بالجزمة

المشكلة انهم ماسابوش دولة الا واستشهدوا بيها حتى بولندا كأن بولندا دى دولة عظمى وقدوة واخر حلاوة ولازم نتبعها

اخر نكتة بقى كانت من المغربى وزير الاسكان اللى قال ان مفيش أى دولة فى العالم بتوفر مياه الشرب ل100%من مواطنيها وده كان رد على مظاهرات العطش اللى فى كل حتة فى مصر

طيب

أولا:اذا سلمنا باللى بتقوله برضه مفيش دولة ماتوفرش مياه الشرب لملايين من الشعب لعشر سنين وأكتر

لدرجة ان فلاحين البرلس خرجوا وقطعوا الطريق للاحتجاج على عدم وجود مياه للشرب لسنين طويلة

ناس بقالها 10 سنين ماعندهاش مية هو ده بيحصل فى أى دولة فى العالم ولا حتى خرابة

ثانيا: مادام الحكاية كدة زى مابتقول؛ ليه بقى بتقرفونا كل شوية بحكاية البنية الأساسية الجبارة اللى اتعملت وعمالين تعايرونا بالبنية التحتية والفوقية والوسطية اللى ماحصلتش اللى اتعملت فى العهد المبارك المنيل ده

كل ماتنتقد حاجة فى البلد يطلع لك واحد بقرنين يقول لك (يا أخى كفاية الكبارى والأنفاق ومحطات الشرب والصرف الصحى اللى اتعملت

كأنها معجزة لم يأت بها الأولون والأخرون وكأن ده شىء خارق ؛طب ماهو ده المفروض ان ده بيحصل فى أى بلد معفن؛واتضح كمان ان حكاية البنية الأساسية دى واسعة حبتين؛ والناس عمالة تموت من المية الملوثة اللى بتشربها؛ومية المجارى مالية الشوارع والناس كل يوم بتموت فى حوادث الطرق بسبب الطرق التعبانة

ماتبقاش غير الكبارى والأنفاق؛ يارب يخليهم لهم ويتربوا فى عزهم

كل شىء فان؛ وتبقى الكبارى

مكة والعمرة وأشياء أخرى

إِنَّ أَوَّلَ بَيْتٍ وُضِعَ لِلنَّاسِ لَلَّذِي بِبَكَّةَ مُبَارَكًا وَهُدًى لِّلْعَالَمِينَ .فِيهِ آيَاتٌ بَيِّـنَاتٌ مَّقَامُ إِبْرَاهِيمَ وَمَن دَخَلَهُ كَانَ آمِنًا وَلِلّهِ عَلَى

لنَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلاً وَمَن كَفَرَ فَإِنَّ الله غَنِيٌّ عَنِ الْعَالَمِينَ

حاكتب النهاردة عن زيارتى لمكة وأدائى العمرة اللى انتهت بنيولوك جديد ليا أهو

نيولوك على نضافة

ان شاء الله النيولوك يكون من برة ومن جوة كمان وان ذنوب الواحد تكون انمحت

عشان الواحد يبدأ من جديد على نضافة

أول ماتدخل الحرم تحس برهبة ودى مش غريبة لأن مكة مش بيت الله الحرام بس لاء دى كمان مركز الكرة الأرضية ومركز المغناطيسية برضه

فسبحان الله

أن تكون أقرع

أحسن حاجة فى ان انت تكون أقرع أن الحلاقة دى بتخلى الجو طراوة وتريحك من تسريح شعرك كل شوية

ناس كتير أوى

الواحد انبهر بتنوع الجنسيات الرهيب اللى فى مكة

ناس من كل حتة جايين لهدف واحد بسانهم يزوروا الكعبة والمسجد الحرام وكمان عشان الصلاة الواحدة فى المسجد بمائة ألف صلاة

دى دعوة سيدنا ابراهيم مستمرة لحد دلوقتى

ثلاث قرعات مع بعض

الفضيحة

روحت أشترى طاقية قطن لراسى حصلت فضيحة

مفيش أى طاقية راضية تدخل عليا كله ضيق على راسى

أصل راسى كبيرة شويتين تلاتة زى مانتو شايفين

حاولت كتير أنا أحاول والبايع يضحك عليا

أنا أحاول وهو يضحك

بالعند اشتريت واحدة واتصورت بيه صورة واحدةا بعد ما دخلتها بصعوبة فى راسى عشان أثبت ان راسى راس طبيعية

ومالبستهاش تانى

مفيش غير حاجة واحدة بس هى اللى ضايقتنى وأنا فى مكة

ان الفندق اللى كان جنبنا كان اسمه "فندق قصر مبارك" قلت فى نفسى حتى هنا مش عايز تسيبنا وكمان قصر مبارك

مش مبارك لوحده حتى

حتى هما؟

واحنا بنطوف كنا بندعى ان ربنا يزيد البيت الحرام مهابة

وكنا بندعى للناس اللى بتزيده مهابة

فكرت كدة قلت يعنى هما ملوك السعودية بيجددوا فى الحرمين يعنى بيويدوه مهابة يعنى أنا كدة بادعى لهم

قلت فى نفسى يلا أهو يمكن ربنا يهديهم واهى دعوة وخلاص

الصلاة على الأموات

عد كل صلاة كنا بنقوم نصلى على الأموات اللى ماتوا فى مكة

يابختهم كل الناس دى بتصلى عليهم وفى المسجد الحرام كمان

ان شاء الله كل ذنوبهم تتغفر

أما المصريين هناك كتير أوى تلاقيهم فى كل حتة

سألت نفسى مادام كل دول مؤمنين وحريصين يعملوا عمرة

أمال مين اللى بيرتشى ويظلم ويسرق

غالبا هما نفس الناس

بس تلاقيهم بيبرروا لنفسهم ويقولوا أصل ده أكل عيش

أو بيقولوا دى حاجة ودى حاجة

السرقة حاجة والعمرة حاجة

مع انه عشان أكل عيش المفروض يبقى حلال

!!!أو بيسرقوا عشان يطلعوا العمرة

أو بيقولوا كله بيسرق اشمعنى احنا

النوعية دى من الناس تلاقيها فى شغلها تاخد رشاوى من الناس عشان يخلصوا لهم شغلهم وبعد كدة يروحوا الجامع يصلوا الفرض وتلاقيهم مش بيفوتوا فرض

وبعد كدة يتكلموا عن الحرامية الكبار اللى ناهبين البلد مع انهم هما كمان ناهبين البلد وحرامية زيهم

أنا واثق ان لو حد تانى حكم البلد دى حيعمل أكتر من مبارك

حيسرق أكتر ويظلم أكتر ويعمل كل حاجة أكتر من دلوقتى

لأن العيب فينا احنا

ادخلوا المستشفيات الحكومية واتفرجوا على اللى بيحصل فيها

هو مين اللى بيهمل ويعامل المرضى بقلة أدب ويسيب الناس لحد ماتموت

مش مواطن مصرى وممكن تلاقيه بيصلى ويصوم وممكن كمان تلاقيه برضه بيتكلم عن الحرامية الكبار اللى ناهبين البلد

مع انه هو نفسه وأمثاله اللى فى كل حتة فى مصر أكبر سبب للوكسة اللى احنا فيها دلوقتى

لأنه شعب بيخاف من خياله

هو مين اللى بيزوز الانتخابات

مش الناس الكبيرة بس

الموظفين اللى ماسكين الصناديق هما اللى بيقوموا بالشغل كله ويقولك أنا مالى ياعم أنا عندى عيال عايز أربيهم

والبلد دى بلدهم يعملوا فيها اللى هما عايزينه

مع ان ربنا كدة عمره ماحيبارك لك فى أولادك ولا فى تربيتهم

لأنك سكت عن الحق والساكت عن الحق مش شيطان بس لا ده شيطان أخرس كمان

ماحدش فكر فى وصف شيطان كله بيركز على كلمة أخرس

مع ان شيطان دى هى المقصودة

شيطان يعنى أسوأ المخلوقات.. وأشر مخلوق على وجه الأرض.. حتى لو انت كويس على طول وبتصلى

مجرد ماتشوف حق وتسكت عليه تتحول لشيطان وأخرس كمان

وتبقى مشارك فى الجريمة

عشان كدة احنا نستاهل اللى احنا فيه

الرسول عليه الصلاة والسلام بيقول

أينما تكونوا يول عليكم

احنا نستاهل مبارك لحد ما نغير نفسنا

لحد مانبطل رشاوى واكراميات

لحد ما نتكلم ونصرخ لما نشوف غلط ومانسكتش

لحد ما نوقف الاهمال اللى فى كل حتة..لحد ماكل واحد يفكر فى البلد مش فى نفسه

لحد ماتبقى الصلاة والصوم دافع للاصلاح والتغيير والتقدم

وتبقى بتنهى عن الفحشاء والمنكر فعلا

الرسول عليه الصلاة والسلام بيقول..من لم تنهاه صلاته عن الفحشاء والمنكر فلا صلاة له

يعنى طول مانت بتصلى وتصوم وفى نفس الوقت ترتشى و وتاخد فلوس حرام وتسكت عن الحق

عمر ما حيكون ليك صلاة أبدا ولا ربنا حيقبل منك أى حاجة أبدا لا صوم ولا زكاة أبدا

لأن الدين مابيتجزءش

يلا نكمل رحلتنا فى مكة

عندهم زى عندنا

فى مكة فى بياعين بيفرشوا على الأرض بيبيعوا بضاعة للمعتمرين كلهم أفارقة عرفت انهم كانوا عبيد جايبينهم من أفريقيا ودلوقتى لا هما عارفين ياخدوا الجنسية ولا عارفين يرجعوا بلدهم

والشرطة كل شوية تطاردهم وتجرى وراهم

زى البلدية عندنا كدة

البايع يبقى حاطط بضاعته ومستعد فى أى وقت انه يجرى

غلابة والله

روحنا حجر اسماعيل وصلينا فيه

وحجر اسماعيل ده جزء جنب الكعبة اللى يصلى فيه كأنه صلى فى الكعبة

روحنا بعد كدة مسكنا الكعبة ودعينا

الحمدلله دعيت لكل الناس اللى كلفونى بالدعاء لهم

طلعت من الحرم لقيت بيتزا هت وكنتاكى فاتحين فى وش الحرم على طول

حتى مش سايبين الحرم فاتحين أدامه على طول

يلا مش مهم

ان شاء الله تكون عمرة مقبولة ويارب تتكرر تانى

تسقط جريدة الفجر

الأسبوع اللى فات كنت مستنى أول موضوع صحفى ينزل لى فى جريدة الفجر اللى أنا باتدرب فيها أناومجموعة

كان تحقيق عن انتشار شرب الحشيش بين طلاب المدارس

استنيت العدد وأنا متوقع أشوف اسمى بينور الجرنان

اشتريت العدد ولقيت الموضوع فعلا

بابص على الموضوع لقيت مفاجأة

أسامى زمايلى نازلة وأنا اسمى مش مكتوب

ايه اللى حصل

لقيت صاحبى بيقولى انه سأل الباز والباز قال له معلش الجايات أكتر

من الرايحات

وان هى غلطة مش مقصودة

أنا طبعا مش مقتنع بالكلام ده

تفسيرى للموضوع انه لما شاف الشغل اللى أنا عملته انبهر بعبقريتى

وتوقع انى حابقى زى محمد حسنين هيكل أو أكتر شويتين

وخاف انى أهدد مكانه بعبقريتى النادرة

عشان كدة ابتدى يحاربنى من دلوقتى ويقطع عليا

صحيح عدوك ابن كارك

يلا ان شاء الله تتعوض وربنا يخزى كل الحاقدين وأعداء النجاح

حكاية عباس

عباس وراء المتراس

يقظ منتبه حساس

منذ سنين الفتح يلمع سيفه ،

ويلمع شاربه أيضا، منتظرا محتضنا دفه،

بلغ السارق ضفة،

قلب عباس القرطاس،

ضرب الأخماس بأسداس

، بقيت ضفة

لملم عباس ذخيرته والمتراس،

ومضى يصقل سيفه ،

عبر اللص إليه، وحل ببيته،

أصبح ضيفه

قدم عباس له القهوة، ومضى يصقل سيفه ؛

صرخت زوجة عباس:

ضيفك راودني، عباس ،

قم أنقذني ياعباس،

أبناؤك قتلى، عباس،

عباس ــ اليقظ الحساس ــ منتبه لم يسمع شيئا ،

زوجته تغتاب الناس

صرخت زوجته : "عباس، الضيف سيسرق نعجتنا،

قلب عباس القرطاس ، ضرب الأخماس بأسداس ،

أرسل برقية تهديد،

فلمن تصقل سيفك ياعباس

وقت الشدة؟

إذا، اصقل سيفك ياعباس

عباس يستخدم تكتيكاً جديداً

عباس شد المخصرة

ودس فيها خنجره

واستعد للجولة المنتظرة

اللص دق بابه

اللص هدّ بابه

وعابه وانتهره

يا ثور أين البقرهْ؟

عباس دس كفه في المخصره

واستل منها خنجره

وصاح في شجاعة:

في الغرفة المجاورة

اللص خط حوله دائرة

وأنذره

إياك أن تُجاز هذي الدائرهْ

علا خوار البقرة

خفت خوار البقرة

خار خوار البقرة

ومضى اللص بعدما قضى لديها وطره

وصوت عباس يدوي خلفه

فلتسقط المؤامرة

فلتسقط المؤامرة-

:عباس

والخنجر ما حاجته؟

ينفعنا عند الظروف القاهرة-

وغارة اللص؟-

قطعت دابره-

ألم تشاهدوني وقد غافلته

!واجتزتُ خط الدائرة

أحمد مطر